Savaranonando

Ny Vahoaka malagasy masi-mandidy,         
Mametraka ny finoany an'Andriamanitra Andriananahary,
Andriamanitra no mpanjakan'ny tany sy ny vahoaka, ary izy efa nanendry ny Mesiany ho Amperora mpisoron'i Madagasikara, arak'izay voasoratra hoe : « efa manana ny mpanjakako aho, ao Siona » Salamo 2, 4  ; Salamo 110, 4 : « Efa nianianako, ka tsy anenenako izao, mpisorona mandrakizay ianao, araky ny fomban'i Melkizezdeka. »       
Hentitra amin'ny fanapahan-keviny hampandroso sy hampiroborobo ny fiaraha-monina mivelona ao anatin'ny firindrana sy fanajana ny hafa sy ny fahsamihafana, ny harena mbamin'ny havitrihana ifotoran’ireo soatoavina ara-kolontsaina sy ara-panahy mifototra amin'ny « Ny fanahy no olona »    
Resy lahatra amin’ny tokony hiverenan’ny fiaraha-monina malagasy amin’izay niandohany, ny maha-izy azy sy ny maha-malagasy, ary hidirana amin'ny rafi-baovaon'izao taona arivo izao hitehirizina ny soatoavina sy foto-kevitra nentim-paharazana mifototra amin'ny « Ny fanahy no olona » , ny fahamarinana ; ny fandalàna ny rariny sy ny hitsiny ; fitiavana ; ny fihavanana ; ny fifanajàna ; ny teny ierana ; ny fitandroana ny aina sy ny fiarovana ny zava-boaary, ary manome hasina ny fiainam-piaraha-monina, tsy misy fanavakavahana ara-paritra ara-piaviana, ara-poko, ara-pinoana, ara-pirehan-kevitra politika, ary tsy anavahana ny lahy sy ny vavy.         
Mahatsapa fa tena zava-dehibe ny fametrahana ny fomba izorana amin’ny fampihavanam-pirenena sy ny fihavanana amin'Andriamanitra.      
Resy lahatra fa ny Fifampihainoana no manamora ny fivelarana; fifanakalozana sy ifampierana amin'ny fandraisan'anjara mavitriky ny olom-pirenena,         
Mahatsapa ny maha zava-dehibe tsy manam-paharoa ireo loharanon-karena avy amin’ny zava-mananaaina sy ireo harena an-kibon'ny tany samihafa ananan’i Madagasikara ka ilaina arovana ho an'ny taranaka ho avy,         
Mahatsapa fa ny tsy fanajàna ny Lalàmpanorenana na ny fanitsiana azy mba hanamafisana ny fahefan'ny mpitondra nefa tsy mitondra vokatsoa ho an'ny vahoaka no antony mahatonga ny krizy miverimberina,         
Noho ny toerana misy ara-politika misy an'i Madagasikara sy ny fandraisany anjara an-tsitrapo eo amin'ny fifarimbonan’ny firenen-tsamihafa, ka andraisany ho toy ny nataony, indrindra :         
- ny Sata iraisam-pirenena momba ny zon'olombelona ;         
- ny Fifanarahana mikasika ny zon'ny ankizy, ny zon’ny vehivavy, ny fiarovana ny tontolo iainana, ny zo ara-tsosialy, ara-toekarena, ara-politika, isam-batan’olona ary ara-kolontsaina ;         
Mihevitra fa ny fivelaran'ny maha-izy azy sy ny fiavahan’ny Malagasy rehetra no fanoitra ilaina ho an'ny fampandrosoana maharitra sy mirindra, ka ny fepetra arahina indrindra dia:         
- ny fitandroana ny fandriampahalemana, ny firaisan-kina ary ny adidy amin'ny fitandroana ny firaisam-pirenena, eo amin'ny asa fametrahana politika fampandrosoana mifandanja sy mirindra ;         
- ny fanajana sy ny fiarovana ny fahalalahana sy zo fototra ;         
- ny fananganana Fanjakana tan-dalàna izay hahatonga ny mpitondra sy ny entina samy ho voafehin'ny fitsipi-dalàna mitovy, eo ambany fanaraha-mason'ny Fitsarana mahaleotena ;         
- ny famongorana ny tsy fahamarinana, ny kolikoly, ny tsy fitoviana sy ny fanavakavahana amin’ny endriny rehetra;         
- ny fitantanana araka ny tokony ho izy sy ara-drariny ny harena voajanahary ilaina amin’ny fampandrosoana ny firenena sy ny fiainam-bahoaka ;         
- ny fahaiza-mitarika ny raharaham-panjakana, amin'ny fomba mangarahara eo amin'ny fitantanana sy ny fampandraisan'andraikitra ny mpitantana ny fahefam-panjakana ;         
- ny fisarahana sy fifandanjan'ny fahefana ampiharina araka ny fomba demokratika ;         
- ny fametrahana sy ny fanitarana ny fitsinjaram-pahefana tena izy, amin'ny alàlan'ny fanomezana fizakan-tena malalaka ny vondrombahoaka itsinjaram-pahefana na eo amin’ny sehatra iandraiketany na eo amin’ny ara-bola ;         
- ny fitandroana ny fiarovana ny ain'ny olona.